39 HOSTAGE NG NPA, 26 PINALAYA, 13 HUMAN SHIELD

DAVAO CITY – Isasailalim ngayong araw sa stress debriefing ang 26 na mga sibilyan na kabilang sa 39 na ginawang bihag ng rebeldeng New People's Army (NPA) sa Sitio Tabon, Barangay Panamin Mabini, Compostela Valley Province na kilalang isang mining community.

Ayon kay Lt. Col. Michael Luico, commander ng 66th IB Philippine Army, tumulong umano sa negosasyon ang barangay kapitan sa nasabing lugar upang ligtas na mapalaya ang mga biktima.

Napag-alaman na sa 39 na mga ginawang human shield, apat nito ay mga bata na kinabibilangan ng isang apat na buwan, isang taong gulang at dalawang tatlong taong gulang kung saan dalawa rito ay mga babae.

Binigyang linaw naman ni Luico na ang detachment ng militar ay nasa Brgy. Mahayahay at malayo sa Sitio Tabon kung saan nangyari ang insidente.

Karamihan umano sa mga minero ay naghahanapbuhay lamang at temporaryong naninirahan sa Sitio Tabon.

Sa kasalukuyan, patuloy ang military operations ng mga sundalo lalo na't alam na nila kung saan nananatili ang mga rebelde. Layon ngayon ng mga sundalo na mailigtas pa ang natitirang bihag ng mga armadong grupo.